– ကတိကဝတ်သည် ချစ်ခြင်းမေတ္တာ၏ ငယ်သူငယ်ချင်း ဖြစ်၏။
– နှလုံးသားကပြောသော ဘာသာစကားအတွက် သတ်ပုံနှင့် သဒ္ဒါကျမ်းများကို ကိုးကားပြုစုသူသည် မိုက်မဲသူဖြစ်၏။
– အချစ်ဆိုတာ သက်တန့်လိုပဲလေ။ ကိုယ့်ဖက်က တစ်ခြမ်းတည်းနဲ့လည်း ပြီးပြည့်စုံတာပဲ။
– အောက်စီဂျင်သည် ဟိုက်ဒရိုဂျင်နှင့် ပေါင်းလျှင် ရေဖြစ်၏။ သို့သော် အောက်စီဂျင်တွေက လွမ်းဆွတ်သတိရခြင်းနှင့် ပေါင်းလိုက်သည့်အခါ မျက်ရည်တွေဖြစ်သွားကြသည်။

သူတို့အဆုတ်၊ ထားခဲ့မြှုပ်သည့်
ဗုံးငုတ်တိုက်မှား၊ မောင်ပြောက်ကျားကို
ရွာသားရွာသူ၊ မေးကြမြူသည်
အူအူယမ်းငွေ့ ထတုန်းတည်း။

အမောင်ပြောက်ကျား၊ ချစ်သူအားကို
ဘာများမှာခဲ့လိုသနည်း။

ငယ်ကကြင်မြတ်၊ မိသက်မှတ်ကို
ခွင့်လွှတ်ခဲ့ကြောင်းပြောပါလေ။

အမောင်ပြောက်ကျား၊ မိဘအားကို
ဘာများမှာခဲ့လိုသနည်း။

မွေးသည့် မိခင်၊ မွေးဖခင်ကို
ဦးတင်ခဲ့ကြောင်းပြောပါလေ။

အမောင်ပြောက်ကျား၊ တိုင်းပြည်အားကို
ဘာများမှာခဲ့လိုသနည်း။

ခရီးမတ်တတ်၊ လမ်းခုလတ်တွင်
ကိုယ်လွတ်ရှောင်ခွာ၊ ခွဲရပါ၍
အားနာခဲ့ကြောင်း ပြောပါလေ။

ယမ်းငွေ့အူအူ၊ တလူလူနှင့်
မေးမြူကြတုန်း၊ အနောက်ကုန်းတွင်
နေလုံးကွယ်လေပြီတကား။

မင်းသုဝဏ်

(မင်းလူ၏ ရင်ခုန်သူများ မှ)

ခင်စောနွယ်ကို စိတ်ဝင်စား နေမိသလားဟု သူ့ကိုယ်သူ မယုံသင်္ကာစိတ်ဖြင့် ဆန်းစစ်ကြည့်သည်။ ခင်စောနွယ်က သိပ်လှသည်လည်း မဟုတ်။ ကိုယ်လုံးလေး ကျစ်ကျစ်လျစ်လျစ် ရှိတာကလွဲလျှင် သာမန် သူလိုငါလိုသာ ဖြစ်၏။ စာတော်ခြင်း၊ ထက်မြက်ခြင်းတို့ကို သဘောကျမိတာလား၊ အချစ်ဆိုတာ ရင်ခုန်ခြင်းက စသည်ဟု ကြားဖူးသည်။ ခင်စောနွယ်နှင့် တွေ့သည့်အခါ ရင်ခုန်ခဲ့မိဖူးသလား၊ အမှတ်တမဲ့မို့ သတိမထားမိချေ။ နောက်လိုက် ပြောင်လိုက်သာ နေခဲ့သည်။ တစ်ခု ကျိန်းသေတာက ခင်စောနွယ်နှင့် စကားပြောလျှင် ပျော်သည်။ သူနှင့် တွေ့ချင်သည့်စိတ် မကြာခဏ ဖြစ်ပေါ်သည်။

အကြင်သူတစ်ယောက်ကို မကြာခဏတွေ့ချင်ပြီး ထိုသူနှင့် တွေ့ဆုံစကားပြောရသည့်အခါ ပျှော်ရွှင်ခြင်းကို အချစ်ခေါ်သလား။ ဒါဆို သောင်းမော်ကိုလည်း ခဏခဏတွေ့ချင်ပြီး ဒီကောင်နှင့် စကားပြောရတာ ပျော်ခြင်းကို ဘယ်လိုလုပ်မလဲ။ သူငယ်ချင်း၊ ခင်စောနွယ်ကို သူငယ်ချင်းလို ချစ်တာပဲ ဖြစ်မှာပါဟု ဆုံးဖြတ်လိုက်သည်။

– မင်းလူ ရေးသည့် ရင်ခုန်သူများ မှ

စောင့်ရှောက်ခြင်းဟာ ချစ်ခြင်းရဲ့ အမြင့်မားဆုံး ပုံသဏ္ဍာန်။ ဒါပေမယ့် မတူတာတော့ရှိတယ်။ ချစ်တာက ကိုယ့်ရဲ့ အကျိုးစီးပွားအတွက် ရယူလိုမှုပါတယ်။ စောင့်ရှောက်တာကတော့ လုံးဝစွန့်လွှတ်မှု သက်သက်ပဲ။ ကိုယ့်ရဲ့ ပိုင်ဆိုင်လိုစိတ်ကို မျိုသိပ်နိုင်ရမယ်။

လေတိုက်ရင် ယိမ်းပြဖို့အတွက်
မြက်ပင်တွေ ပေါက်နေကြတာ မဟုတ်ဘူး။
….
ကိုယ့်ရူးသွပ်မှုနဲ့ ကိုယ်စိမ်းလန်း
ငါ့အပေါ်
ဘယ်သူမှ လမ်းဖြတ်မလျှောက်ရင် တော်ပြီ။

– အရိပ် ဆိုသည်မှာ အလင်းမဲ့သော အလင်းတမျိုးသာ ဖြစ်သည်။

– မသိမ်းပိုက်သောသူဟာ အရာရာကို အောင်နိုင်တယ်။

– မိန်းမတစ်ယောက်၏ မျက်ဝန်းသည် အေးမြသော မီးတောက်မီးလျှံတစ်ခု ဖြစ်သည်။

– တစ်စုံတစ်ခုကို ရယူပိုင်ဆိုင်သည် ဖြစ်စေ၊ တစ်စုံတစ်ခုကို စွန့်လွှတ်ဆုံးရှုံးသည် ဖြစ်စေ… တကယ်တော့ အရာရာသည် ဘာမှ မဟုတ်ကြပါ။ ဝမ်းသာစရာရှိလျှင် ဝမ်းသာပြီး စိတ်ဆိုးစရာရှိလျှင် စိတ်ဆိုး၍ ဝမ်းနည်းစရာရှိလျှင် ဝမ်းနည်းလိုက်ရုံသာ ဖြစ်သည်။ ဘာကိုမှ သယ်ဆောင်ဖို့ မလိုပါ။